بالنسبة لكتاب الفنان حسن الحلوجي " مات الكلام " اللي مش عاجب ناس كتير لانه صفحات فاضية  ونازلين قلش عليه عايز اقول لكم بس انه من ثلاثين سنة يمكن الدكتور عبد القادر القط حكالي حكاية عن ندوة حضرها اظن في بلجيكا لشاعر عامل ديوان فاضي قعد الندوة كلها ساكت والدكتور القط مذهول . وبرضه من حوالي خمسة وعشرين سنة شفت في متحف بومبيدو في باريس لوحة فاضية مكتوب عليها لوحة المستقبل . وبرضه من حوالي خمستاشر سنة فيه كاتبة مش فاكر اسمها للاسف عملت كتاب فاضي وكتب عنها انيس منصور بنفسه
وانا لما اتجننت وكتبت مسلسل اسمه بين شطين ومية من ستاشر سنة  الهمتني حكاية الدكتورالقط ولوحة باريس فعملت مشهد لحسين فهمي  اللي كان قايم بدورمثقف ضايع ماعندوش حتي كتاب واحد بيعمل ندوة صامتة في القهوة واتنين مخبرين قاعدين بيقولوا لبعض طيب احنا حنعمل ايه في التقرير اللي حنكتبه وبعد الندوة قالوا لحسين فهمي الحقيقة انهم مخبرين وعايزين اي كلمتني يكتبوهم قال لهم قدموا التقرير فاضي للضابط وهو حيفهم انا قلت ايه  . يعني عملتها سياسة مصرية  . يعني الموضوع عالمي ومش ضروري يكون سياسة زي ما انا عملت في المسلسل علشان الناس البسيطة تستوعب . طبعا المسلسل دا خفاه التليفزيون . عرضه مرة واحدة في القناة الفضائية وخفاه لانه كان كله فنتازيا سياسية بس مش دا الموضوع وماحدش يسالني عن المسلسلات  والنبي . . المهم الموضوع مسالة قديمة وعالمية وممكن لاي كاتب يعملها مرة واحدة كنوع من الاحتجاج علي مايحدث بإظهار العجز عن تجسيده . فلسفة ممكن .. سياسة ممكن . زي ما تحبوا . فبلاش القلش علي حسن . وبالمناسبة ياريت حد يكتب اللي حاقوله دا قصة . دولة قمعية كل الكتاب فيها قرروا ينشروا كتب فاضية . الدولة ارتبكت مش عارفة تقبض علي حد فاستعانت بالاسلاميين يساعدوها في تفسير الأمر فافتوا ان الصفحة الفاضية زي المراة العريانة لان الحروف هي الزي اللي بتلبسه الصفحة فقبضوا علي كل الكتاب بتهمة نشر الفحش . بس والنبي اللي يكتبها يهديها لي . هههههههههه
( من صفحته )