شكرا انك نبهتني !
Wednesday, June 29, 2016 - 19:24
المقالين دول كتبهم حسام السكري عشان يثبت فكرة معينة. الاتنين زي بعض تماما .. واحد بيتكلم عن نفس الموضوع باسم الوطنية والتاني بيتكلم عن نفس الموضوع باسم الاسلام..
والاتنين بيستخدموا نفس الحجج والمنطق والآلية: إقرا .. واستخدم عقلك إنت مع مين فيهم؟ .. ولا مع حاجة ثالثة خالص!
***************************************
الأول:
- انت عارف طبعا إن دينك أغلى وأهم حاجة في الوجود
- أكيد طبعا
- خد بالك ان الإسلام له أعداء، وأعداءه دول بيتمتعوا بخبث شديد
- ازاي يعني
- بيحاولوا يهدموا الدين بطرق جهنمية. بيبقى شكلها مشروع لكن غرضها الحقيقي هو القضاء على العقيدة.
- زي إيه مثلا؟
- ممكن مثلا ينتقدوا الشيوخ والعلماء. هو طبعا النقد مشروع لكن لما يكون غرضه الهدم لازم نخلي بالنا منه
- ده كلام مهم فعلا.. شكرا انك نبهتني
- وممكن يحاولوا يثيروا أسئلة عن حاجات شكلها مشروع زي التعارض بين حقوق الإنسان وبعض التعاليم الشرعية، أو يتكلموا عن فساد بعض رجال الدين، وعلاقتهم بمؤسسات توظيف الأموال مثلا.
- انا فعلا باسمع الكلام ده. هو ده كلام مشروع؟
- مش في أي ظرف. فيه مؤامرة على الإسلام، وأول ما تسمع حد بيستخدم الكلام ده اعرف انه عاوز يهدم ويدمر. اللي يتكلم عن حقوق الإنسان أو ينتقد المشايخ والعلماء، أو يشير لفساد المؤسسة الدينية، ده بيبقى عميل على طول. مأجور علشان يهدم الدين ويدمره.
- والله ما كنت واخد بالي. انا هاعمل كده على طول
- عفارم عليك. اللي يتكلموا عن الإنسانية والمساواة بين الناس في العقيدة، أو عن محاربة فساد المشايخ نعمل فيهم إيه؟
- نهبش فيهم على طول وما نسيبهمش.. دول أعداء الدين ما فيهاش كلام
***************************************
الثاني:
- انت عارف طبعا إن دينك أغلى وأهم حاجة في الوجود
- أكيد طبعا
- خد بالك ان الإسلام له أعداء، وأعداءه دول بيتمتعوا بخبث شديد
- ازاي يعني
- بيحاولوا يهدموا الوطن بطرق جهنمية. بيبقى شكلها مشروع لكن غرضها الحقيقي هو القضاء على الدولة.
- زي إيه مثلا؟
- ممكن مثلا ينتقدوا قادة وزعماء الوطن. هو طبعا النقد مشروع لكن لما يكون غرضه الهدم لازم نخلي بالنا منه
- ده كلام مهم فعلا.. شكرا انك نبهتني
- وممكن يحاولوا يثيروا أسئلة عن حاجات شكلها مشروع زي ممارسات حقوق الإنسان في مصر مثلا، أو يتكلموا عن فساد السلطة، وعلاقتها برجال الأعمال.
- انا فعلا باسمع الكلام ده. هي الاأسئلة دي مشروعة؟
- مش في أي ظرف. فيه مؤامرة على الوطن، والناس الخبيثة دي بتستغل المواطن حسن النية، لكن انت لازم تبقى واعي وأول ماتسمع حد بيستخدم الكلام ده اعرف ان غرضه ونيته هو الهدم مش البناء، اللي يتكلم عن حقوق الانسان أو ينتقد كبار المسئولين أو يشير لفساد السلطة ده بيبقى عميل على طول. مأجور علشان يهدم الوطن ويدمره.
- والله ما كنت واخد بالي. انا هاعمل كده على طول
- عفارم عليك. اللي يتكلموا عن الإنسانية والمساواة بين الناس في العقيدة، أو عن محاربة فساد المشايخ نعمل فيهم إيه؟
- نهبش فيهم على طول وما نسيبهمش.. دول أعداء الدين ما فيهاش كلام
( من صفحة د. حسام السكري - كاتب واعلامي مصري مقيم في لندن )
التعليقات