رمضانيات .. حسام السكري
Tuesday, June 14, 2016 - 11:35
نقول تاني وبوضوح شديد علشان الموضوع ده مهم.
اللي رافضين حرية الرأي بحجة ان استماعهم لرأي مخالف فيه إرغام لهم على احترام أو قبول مضمونة غلطانين (أو بيستعبطوا).
محاولة حصولهم على رخصة قمع باعتبار أن سماع رأي مختلف فيه "فرض وإكراه"، محاولة ملتوية للاجتراء على حق طبيعي وبديهي لكل إنسان.
محدش طلب منك تحترم أو تقبل أي رأي أو صاحبه.
عادي خالص ان الرأي في تصورك يكون سفيه، حقير، مغرض، خبيث، ساذج، سطحي، تافه، جاهل، مدلس.. قول زي ما انت عاوز.
ما هو ده رأي برضه..
لكن لازم وغصب عنك تحترم حق أي شخص في إنه يقول رأيه مهما كان مخالف طالما إن ليس تحريضا على القتل والكراهية ومفيش فيه خرق للقانون..
حق الرأي والتعبير مكفول في كل حاجة، حتى فيما تعتقد حضرتك إنه ثوابت، ومعلوم من الدين بالضرورة.. تصور؟!
طالما مفيش تحريض أو كراهية أو ما يخالف القانون يبقى ماشي...
طبعا ده ممكن يكون غريب لناس اتعودت ان التحريض على الكراهية والقتل هو سلو بلدنا اللي بنطالب بيه لمن يخالف الإجماع.. بس ده الشذوذ مش الطبيعي الحقيقة (ظبط البوصلة شوية).
وعلشان ابقى واضح أكتر.. أي حد من حقه يقول أي أي أي حاجة
يقول الشمس بتطلع من الشمال، يقول انه اتولد في عطارد.. يقول ان الجاذبية بتشد الناس للقمر.. هو حر.. وانت كمان حر.. ترد عليه، ما تردش، تعترض، تغلطه، تستتفهه، تعتبره مجنون..
عيش حياتك خالص..
عارف ليه ده مهم؟
لإن رأيك انت ممكن بالنسبة لغيرك يكون في غرابة القول بان الشمس بتطلع من الجنوب، وإنك اتولدت في المريخ..
رأيك مش المعيار اللي بنظبط عليه المنطق ولا حاجة.
انت بيتهيألك انه إنه موضوعي وبديهي وواضح ومتوسطن ومعتدل ومتزن وحصيف وفكيس ولوذعي ومدهش وثاقب، بالضبط بالضبط زي صاحب أي رأي تاني غريب (وتافه وحقير وشاذ بالنسبة لك)، ما هو شايف رأيه بالضبط.
علشان كده تقييمك لأي رأي ما مالوش تلاتين أي قيمة أو لازمة فيما يتعلق بمسألة التعبير عنه.
ما تحترمش الرأي، لكن احترم حق الإنسان في إنه يختلف، ويكون له رأي، وكمان يعبر عنه..
احترم الحق ده لإنه حقك انت كمان..
وصلت؟
التعليقات