ألو.. صباح الخير يا فندم.. لا والله مفيش حاجة مستعجلة.. انا بس حبيت اطمئن على بيضة سياتك.. وجع خفيف؟ تقصد إيه يا فندم؟ لأ يا فندم ألف سلامة عليك.. ما اقصدش الـ... أيوه يا فندم أيوه.. اللي عليها لفظ الجلالة .. طب الحمد لله.. أرجوك حافظ عليها.. دي ما بقتش بيضة عادية.. دي بقت رمز وعلامة وانشاء الله يبقى لها أتباع ومريدين.. والله يا فندم أنا كمان قلقان لا تتخبط والا تتكسر واللا حاجة.. انا برضه فكرت في الحكاية دي.. هي فعلا ممكن تمشش.. أنا رأيي كده والله.. خبير تحنيط ممكان يحل المشكلة... بس احنا مبدئيا ممكن نسلقها.. طب هل اتعرفنا على الفرخة المسؤولة يافندم؟.. لأ ما هو احنا لازم نفتح عينينا كويس.. ممكن تبيض بيضة تاني يروح وسط البيض العادي.. دي أمانة يا فندم وإشارات ربانية.. احنا ممكن نعمل لجنة وظيفتها متابعة البيض.. بيضة بيضة يافندم من لحظة ما تبدأ تطلع من زلمكة الفرخة..
والله ما تتخيلش حضرتك الزملاء في المحافظة مهتمين قد إيه وكلهم نفسهم يتطوعوا للمراقبة.. دي مهما كان فيها ثواب.. ممكن نسميها المجلس الأعلى للشؤون الزلمكية، أو إدارة شؤون البيض.. حضرتك مش هاتغلب.. يا فندم العفو.. انا ما عملتش حاجة.. ده واجبي ومفيش حاجة تغلى على مقامك.. البيضة بركة للمحافظة كلها ومن ساعة ما طلعتوا البيان الصحفي والكل مهتم وبيسأل.. ده حتى المدام والولاد من ساعة ما صحيت بيقولوا لي اتصل علشان يطمئنوا على بيضة سياتك.. انا عارف يافندم والله بس هي بيضة سياتك قبل ما تبقى بيضة أي حد.. المحافظة ياما ورد عليها محافظين محدش فيهم طلع له بيضة زي دي..
طب لو تأذني لي انا عندي طلب وياريت ما تكسفنيش.. يعني ياريت انا والمدام والأولاد نيجي ونستبارك ببيضة حضرتك.. بيضة الورع.. بيضة التقوى والإيمان.. نشوفها بس... لا والله يا فندم ده كتير.. كتير قوي.. يعني كمان هنمسكها ونستبارك بيها.. متشكر قوي يافندم... ربنا يحفظك.. ده بس من لطفك والله.. ده المدام هتدعيلك.. في رعاية الله يا فندم.. مع السلامة يافندم.. سلامنا ليك وللبيضة والله.. ربنا يبارك.. لا إله إلا الله يافندم.. اتفضل يا فندم.. اتفضل.. في رعاية الله.. اتفضل.. اتفضل.. اتفضل..