لما تيجي تكراش على بنت وتلاقيها بتحطك في الفرند زون، لازم تقف مع نفسك في أكتر من مكان أولهم المراية، وتمسك في إيدك ورقة وقلم وتشوف هتاخد كام من العشرة اللي جاين دول.

بوابة "الحكاية" استطلعت رأي البنات عن أكتر الأسباب اللي بتخليهم يحطوا الرجالة في الفرند زون، وكانت دي أهم الإجابات اللي عليها إجماع:

1- دمك تقيل

أول حاجة البنات بتنهار منها الدم التقيل والاستظراف، يعني لو أنت دمك تقيل وراضي بده هتلاقي اللي تتقبل، بس تخيل إنك مش طايق نفسك وبتستظرف إزاي هي هتستحمل تعيش معاك كدة تحت سقف واحد ؟!

الحالة الوحيدة اللي البنت بتستحمل فيها تقل دم الراجل إنها تكون اتدبست ومكتشفتش ده غير لما اتجوزته .

2- مش مهتم بقرعتك

معايير الجمال اختلفت كتير مؤخرا في مصر والعالم كله، يعني البنت الكيرفي بقت موضة، أنت كمان لو أقرع في بنات كتير بيبقوا مهوسين بالقرع على غرار بروس ويليس وفين ديزل، بس لو أنت لسه متمسك بقرعة أحمد بدير لازم تقبل بالفرند زون .

3- سطحي

السف الكتير والقلش ليه وقته، وبيخليك نجم القاعدة مع ناس كتير بس لو بتكراش بنت مثقفة وبتشتغل وظيفة بتستعمل فيها عقلها فاعرف إن الوصف الوحيد للحالة دي عندها "سطحي"، وهتدخل مع إخواتك اللي سبقوك في الفرند زون .

4- كذاب

البنت ممكن تستحمل عيوب كبيرة في شخصيتك، إلا إنك تكون كذاب أو بتخلف وعدك لأن ده أحد أنواع الكذب بالنسبة لها .

5- مش ستايل

بتشتري لبسك من فين؟ مش لازم تكون بتلبس براندات أصلية عشان تكون ستايل بس لازم تجاري الموضة، وبلاش موديلات الستينات والسبعينات .

6- البنطلون المنقور

لو بتشرب سجاير تبغ فغالبا ممكن تعلم على لبس كتير عندك وتهاديك بنقرة في كذا بنطلون وتيشيرت، النقرات دي البنات بتفهمها إنك راجل محشش ليل ونهار وكمان بخيل مش مهتم بمظهرك.. إزاي هتهتم بيها بقى ؟!!

7- جزمتك

الرجل الأنيق المنمق عنوانه لمعان حذائه.. دي قاعدة بنات حواء في الكوكب كله .

8- ياقة القميص

بلاش تلبس القميص يومين ورا بعض أو تفضل لابسه من الفجر أول ما تنزل شغلك لحد بليل لما تقابل البنت اللي معجب بيها، أول حاجة بنبص عليها كبنات هي ياقة القميص وأساوره ( لو بكم يعني ) ومن هنا بنقيم شخصيتك ونزوقك ع الفرند زون في أغلب الأحوال .

9- مغرور

لو مغرور بعلمك أو أخلاقك أو حتى نافش ريشك زي الطاووس بدون داعي، هيكون مكانك غالبا الفرند زون لأن البنات بتدور على شريك تكمل معاه حياتها مش راجل تعالجه نفسيا .

10- بخيل

هاتي حتة .. اديني بوق .. تعالي نتمشى بالعربية.. دي كلها عبارات تنفع تتقال لصحابك بس بلاش الكراش بتاعتك لأن البنات بتفهم ده على إنه بخل، وهتتحط في الفرند زون من أول مرة، وهيتعمل لك بلوك لو قولت لها في مرة كل واحد يدفع لنفسه.