مين فينا مكتبش "جواب حب" للجو في ثانوي، ومين فينا ما استخدمش شعر العامية "المسجوع" "المقفى" "الركيك"، من نوعية "متلهف عليكي، وفي ضي عنيكي، وبوس إيديكي"، علشان يقول لحبيبته إنه "واد كتيب" و"حساس" و"حبيب". طلعوا "الشاعر" القديم اللي جواكم، وادخلوا التجربة معانا، وممكن تبقوا شعراء عامية "جامدييييييين" بكام كوباية شاي خمسينة، وحجرين معسل، والمسألة سهلة..

Follow me….. 1ـ "الفكرة"VS "أي حاجة" كل شيء يصلح لأن يكون مادة للكتابة، فلو كنت جالسًا في أمان الله، ولمحت فتاة تركب سيارة سيراتو "حمرا"، اكتب ما يلي: "سمرا وعدت/ وعدت على قلبي/ بعربية حمرا/ ملحقتش أشاور لها/ وفط قلبي جنبها/ ونسيت أنا رايح/ ولا راجع/ ولا جاي قبلها".
2ـ أول القصيدة عُك أي كلمة في أي مكان في القصيدة تصلح للبداية، لو "طلبت" معك ممكن تبدأ بالقديم، مثل "الأولة آه/ والتانية آه/ والتالتة آه/ الأولة آه على الرسالة اللي بعتها وموصلتشي/ والتانية آه على اللي دخلت قلبي ولا خرجتشي/ والتالتة آه على اللي قالتلي بحبك فقولتلها وماله ومفهمتشي".
3ـ الحشو الحشو خير، كل ما يمر في بالك يمكن أن يكون مادة داخل القصيدة، خد مثلا "البنت اللي واقفة هناك/ مستنية صاحبها/ ومش هيجي/ زيي تمام/ وأنا واقف هنا/ مستني صاحبتي/ ومش هتيجي/ يادوب نعدي الشارع/ وبس نبتسم/ وفي نصه نقف/ ونقول: مجوش/ عادي مايستهلوش/ وأشد إيدها/ وتدوب في إيدي/ وأجري وتجري معايا/ ولو جم صحابنا يبقى نقولهم/ يعدوا لبعض الشارع".
4ـ القفلة.. نقطة تقفل قصيدتك "إزاي"، ببساطة "متقفلهاش أصلاً"، أو قطع آخر كلمة لحروف، وضع كل حرف في سطر، أو ارمي كلمة واحدة جوه القصيدة أكتر من مرة، واقفل بيها، أو "صيع" على القارئ، وضعه في "مود"، وفي النهاية "لبسه" في "مود" آخر، مثلا لو تتحدث عن الفتاة التي تبيع الورد على الكورنيش، وأنت متحامل عليها، والقارئ كرهها، اكتب في النهاية مثلاً "مكنتش بتعمل كده/ لأجل أنها/ كانت في يوم نفسها/ يبقى لها حبيب".
5ـ العنوان أي كلمتين "حلوين" متجاورين، أو أكثر كلمة قيلت في القصيدة، أو أكتب عنوان لا علاقة له بالموضوع أصلاً، مثل "الشقة اللي في الخامس".
6ـ الغرض والذي منه الغرض يعني "القصيدة عايزة إيه"، لا تصعب الأمر على نفسك، كل شيء يمكن الرمز إليه بشيء آخر، فمثلاً "وديل فستانها متجرجر في الشارع"، هذا مطلع قصيدة وطنية يرمز لمصر، أو اجتماعية عن للتحرش، أو حب ووداع، أو حتى ثورية، "بيس يا معلم" كل شيء ممكن.
7ـ خليك مباشر المباشرة تعني أنك تكتب بطريقة واضحة، "طب وإيه يعني؟"، أنت تكتب لأجل البسطاء، الأميين، وهم قطعا لا يفهمون التورية، فمثلاً لو أردت أن تكتب بحبك، أكتبها بحبك، إيه المشكلة؟، سيقولون "وما الفرق بينك وبين رجل الشارع العادي؟"، قل إنه ينطقها بفتح الباء وأنا أكسرها.
8ـ الإلقاء.. جخ هناك مدرستان في الإلقاء، الأولى مسرحية، وهي التي تجعل منك ممثلاً مسرحيًا، تفرد يدك وتضمها، وتنثني وتنفرد، زي الشاعر الجخ، والثانية "مبتعرفش"، وتقرأ الشعر عادي، وتقول "وظيفتي الكتابة مش الإلقاء".
9ـ تحابيش الفنان هو "اللي يجيب التايهة"، مثال: "في عز الشمس بتعرفني الضلمة/ والحزن صنعتي/ مصنعتهاش ولا ورثتها/ لقتها في الحيطة/ يوم ما دخلت استخبى فيها/ خرج الحزن وعشش جوايا/ وفضلت أنا محبوس جوه الحيطة"، أو "اتفذلك" مثل "أوقات كتير بتوه جوايا/ وجوايا منفد على جواكي/ ولما بعافر بطلع مني/ ألاقيكي فيا/ وألاقي نفسي مش جوايا/ دا أـنا جواكي".
10ـ كتبت.. "كل عيش بقي" شعرك يعرف طريقه إلى السوشيال ميديا، لذلك لابد من البحث عن مغني "اندرجروند" يغني كلماتك، في الغالب سيكون جاهلا، ولا يعرف الفرق بين الغنيوة والشتيوة، وأخيرًا وسط البلد، وساقية الصاوي، افرض نفسك ع الكل، أنت شاعر وكبير كمان.