9 صفات في المرأة المصرية مقالتهمش شويكار لفؤاد المهندس

الست المصرية كائن ملهوش حل، ينكمش ويتحلل في مطبخ البيت، عينيها علي العيال، ودماغها في الأكل اللي علي النار، ويديها في جيب زوجها، وقلبها مع جارتها اللي نسيت ترجعلها مخرطة الملوخية، كائن متعدد المهارات، وعلشان الحسد ممكن نكتفي بذكر عشرة صفات نسيت تقولهم شويكار لفؤاد المهندس في منولوج الست المصرية من فيلم "مطاردة غرامية".

• البنت المصرية هى الوحيدة اللى أمها تبدأ تجهيزها للزواج من أول ما تتولد، تشتري لها اطقم الحلل في مرحلة الحضانة، والمفارش في اعدادي والشفتشي في ثانوي.

• الست المصرية هى أكثر واحدة فى العالم تقول لجوزها " طلقنى " وهى تقصد حاجة تانيه.

• الوحيدة فى العالم اللى ممكن تفضل لابسه أسود حزناً على جوزها لغاية ماهى نفسها تموت.

• عندها مهارة أنها تاخد الحاجة أم 70 جنيه بـ 5 جنيه بس وتحس فى الآخر أن البياع غلبها. 

• المصرية هى الوحيدة اللي تقدر تشيل أنبوبة غاز على رأسها وتمشى بيها عشرات الكيلو مترات وشايفة أنها بتعمل حاجة عادية.

• هى اللى علي الشاطئ وماتنزلش البحر، وتحضر الاكل لجوزها والعيال وتناولهم الهدوم لما يطلعوا من البحر وتكون سعيدة جدا.

• هى اللى اسمها بيفضل سر وعيب وحاجة متقالش قدام صحاب جوزها وزملاء عيالها.

• هى الغلبانة اللى ممكن توافق أن جوزها يتجوز أو يعرف عليها واحدة تانية سواء بعلمها أو غصب عنها.

• هي الوحيدة اللي تشتغل وتصرف علي بيتها وجوزها العاطل يرجع من القهوة يتخانق معاها لأن الأكل مش عاجبه

التعليقات