إحنا...مثل كل الدول في العالم...نمر في أزمة إقتصادية لسة في صباها...يعني الأمور ستزداد سوءا والجميع حايتأثر دخله ... لأن الكاش حايتناقص والناس حاتبطل تدفع المستحقات اللي عليها.. لأن دايرة السيولة النقدية ستتوقف تقريبا

إحنا كعائلات...قاعدين في البيوت ومابنصرفش كتير غير على الأكل والشرب... وفترة التوقف حاتشيل من تكاليفنا اليومية حاجات زي البنزين والمواصلات...حتى قروض البنوك وفواتير الكروت الإئتمانية والأقساط تم تأجيلها من قبل البنك المركزي لمدة ست شهور...يعني ممكن نتحمل المرحلة الجاية وتبدأ العجلة في الدوران في شهر سبتمبر لو كنا محظوظين واختفى الوباء في شهور الصيف.. ونقدر نستكمل حياتنا ولو واجهنا بعض الصعوبات الى نهاية ٢٠٢٠

لكن...إحنا داخلين على رمضان بياميشه ومكسراته وعزوماته...وبعده العيد ...ثم يأتي الصيف ونسافر الساحل حيث كل شيء بخمس أضعاف ثمنه...لأنه موسم بقى يا سعادة البيه... وبعده العيد الكبير وندور على العجل أو الخروف وكلنا عارفين بقى فرصة الوباء وماحدش اشتغل بقاله ٤ شهور ففرصة لتجار المواشي والجزارين إنهم يسرقوك علني...ثم يأتي تاريخ العودة الى المدارس ونبدأ ندبر المصاريف والبروچيكتس والتبرعات والباصات... يعني ٤ شهور عادة كارثيين على جيب المواطن المصري في الظروف العادية ... فما بالك بالحالة الإستثنائية اللي بنعيشها كلنا...

نصيحة... الكاش عزيز... وخليك ماسك في جنيهاتك وكأنها آخر فلوس عمرك حاتشوفها...لأن من هنا لغاية آخر السنة...مابين الوباء وإنتهاءه ومحاولة العودة للحياة الطبيعية ...قدامنا ٩ شهور صعبين...ده طبعا لو قضينا على الوباء بلا رجعة... وحتى ده أمل بدأ يتسرب الشك في نفوسنا تجاهه...وبالذات لما نعرف إن الصين اللي أعلنوا إنتهاء الوباء...ظهر عندهم ٤٧ حالة جديدة بالأمس وتوفى ٤... وكوريا الجنوبية اللي قلنا سيطروا على الموضوع بسبب إنظباطهم والحاجات دي... ظهر فيها بالأمس ١٠٠ حالة جديدة وتوفي ٦...يعني الحالات لسة بتظهر وحتى الصين مش قادرة تخبيها... ده غير نيويورك اللي عدد الحالات بتتضاعف كل ٧٢ ساعة.... وايطاليا اللي بيختاروا مين يتعالج ومين يتساب يموت...وبعد لما إفتكروا إن حالات الوفاة بدأت في التراجع يومي الاتنين والثلاثاء واعتبروا ده مؤشر لنجاحهم...أصيبوا إمبارح بصدمة لما عدد الوفيات عاد برقم تخطى ال ٧٠٠ وفاة وأصيبوا بإحباط نفسي ...وأسبانيا اللي المرضى بيناموا على أرض المستشفيات من كثرهم... وحاييجي يوم والطواقم الطبية اللي بتعمل أعمال بطولية حاينهاروا تماما.. ولن يجد المريض من يعالجه

كاشك في جيبك...وعقلك في راسك...تعرف خلاصك #ماتقلقوش
(من صفحته)