يوم السبت الماضي ظهرت الطفلة المصرية هايدي في برنامج ذا فويس كيدز...ومع ان صوتها حلو...فلم يختارها اي من ثلاثي لجنة الحكام للانضمام لفريقهم...وتم استبعادها من البرنامج...حسب قواعد البرنامج...بتحصل كتير

لكن طبعا المصريين دخلوا علينا بنظرية المؤامرة الصهيو لبنانية لاستبعاد هايدي لانها مصرية...وازاي وازاي هايدي مايختاروهاش...دول عايزين يكسبوا طفل تاني...لانهم ببغيروا من مصر...لان مصر مذكورة في القران...والقناة دي عندها اجندة خفية...وبالامارة حماقي كان حايلف ويختارها ولكن ادارة البرنامج عطلت زرار الكرسي...ده بخلاف المطالبات بإعادة هايدي مرة اخرى...مع ان هايدي سجلت الحلقة دي من فترة...ورجعت بيتها...ومش بعيد تكون اتجوزت وخلفت منة و سليم...ولما اشتركت كانت عارفة شروط البرنامج والبنت تقبلت قرار الابعاد بشجاعة

لكن الشعب المصري لن يسكت طبعا...واصاب هايدي بمتلازمة "نادي الزمالك" مدى الحياة...واعراض الحالة دي الشعور بالظلم ولوم الاخرين على كل فشل حاتتعرض له في حياتها...وتعليقه على اي شماعة من الاستقصاد الى السحر الاسود...واؤكد لكم ان لو البنت كان عندها امل تكبر وتبقى مطربة...فالامل ده لن يتحقق وهي شاعرة طول الوقت بالتربص والاضطهاد وان فيه مؤامرات بتحاك ضدها

احنا لما نحب حد ...بنخنقه بحبنا...زي محمد صلاح كدة...وبنفتكر اننا فاهمين في الفنيات اكثر من كلوب لو قعد صلاح احتياطي...ولو لعب وماجابش اهداف يبقى السبب زمايله مابيبصيلوش الكورة...هي نفس المتلازمة

كفوا ايديكم عن هايدي...حرام عليكم اللي عملتوه في البنت