رسالة من القلب لمجلس إدارة النادي الأهلي

أرجو إن أي حد يعرف حد في المجلس يوصلهالهم

تحية طيبة وبعد

إحنا تعبنا يا جماعة... مش من الهزيمة والخروج الغير مسبوق من بطولتين في أسبوع واحد...لا...إحنا تعبنا من عدم القدرة على إتخاذ قرارات وتعبنا من الإختيارات الخاطئة...الواحد تلو الآخر...وأرجوكم تردوا على الأسئلة دي ... حتى بينكم وبين بعض

شغلتونا في بداية الموسم بالخناقات مع تركي آل الشيخ اللي غالبا إكتشف إنه بيتحلب صافي و هرب منكم لأن الطمع وحش و دي مش من مباديء النادي الأهلي... وفقدتوا الدجاجة التي تبيض ذهبا ... بخجة مبادىء النادي الأهلي...طيب هل المباديء الجبارة دي تمكنكم من الإجابة عن الأسئلة دي...يبقى عاشت المباديء

١- مين المسؤول عن عدم تجديد عقد عبدلله السعيد في الوقت المناسب و إنتظرتم الى أن فرط الموضوع من إيديكم؟

٢- مين المسؤول عن عدم شراء لاعبين على مستوى الأهلي وإكتفيتم بكوليبالي اللي بيقع أكثر ما بيقطع كور... وهل كنتم معتمدين على مجموعة اللاعبين اللي واضح إن البدري العميق بلاكم بيهم قبل مايمشي علشان هو من النوعية دي من الأشخاص وانتم سذج؟

٣- مين المسؤول عن اصابة وليد أزارو وعلي معلول وأجايي وعمرو السولية وأحمد فتحي وباسم علي ومحمد هاني والنهاردة صلاح محسن بعد دقيقتين؟ هل الطبيب خالد محمود اللي في الصورة تحت عنده كفائة معينة وأي معلومات عن إصابات الملاعب ولا قريب كابتن إكرامي برضه؟

٤- مين بيسمح إن مروان محسن أصلا يبقى في قائمة الإحتياطي؟ واضح لجميع الناس والزمالكاوية أصبحوا بيبخروه علشان يفضل يلعب ومايتصابش... ده لاعب لا يصلح إنه يلعب في الدوري أصلا... ولو قولتولي إن كوبر إختاره في المنتخب ...فنتايج كوبر تتحدث عنه

٥- حد فهم اللاعبين أمثال إسلام محارب و هشام محمد ومحمد شريف إنهم بيلعبوا بفانلة النادي الأهلي مش نازلين فسحة مع أصحابهم؟

٦- هل إنتم جاهزين بصفقات مهمة ولا حاتكون إختيارات فاشلة مثل الذي سبق؟ وهل مباديء النادي الأهلي حاتقف حائل مابينكم وما بين التفاوض الجيد مع الأندية الأخرى؟

٧- هل إنتم فاهمين إنكم مجلس إدارة النادي الأهلي ولا هي مجرد وجاهة إجتماعية للبعض؟ وعضو المجلس وصل و عضو المجلس راح... وننفلق إحنا من كتر القهر

٨- مين اللي بيختار هيثم عرابي ومين اللي بيصالح فضل انه زعل من تعيين هيثم عرابي؟ ومين اللي بيتعاقد مع اللاعبين وحسام غالي دوره ايه بالظبط.. وسيد عبد الحفيط مهاراته الإدارية بتحددوها إزاي وليه كل شوية نمشي مدرب حراس المرمى و بعدين نرجعه تاني... وازاي إنتوا ساكتين على إن إكرامي أصلا يكون من ضمن التشكيل؟ ومش كفاية سيطرة الشيخ إكرامي على النادي و فرض نفوذه؟

٩- فين أشبال النادي الأهلي وهل فريق الناشئين مافيهمش لاعبين ممكن نصعدهم؟ يا كابتن بيبو إنت نسيت لما طلعتوا كأشبال بعد ما فزتم على أشبال الزمالك ٧-١ عملتم ايه لمدة ١٥ سنة على الأقل؟ فين قطاع الناشئين؟

١٠- ليه لازم نجيب مدرب أجنبي فاشل؟ واحنا عندنا مختار وعلي ماهر والنهاردة عماد النحاس يسووا رقبة جميع المدربين الأجانب بعد جوزيه
فلماذا لا نستغلهم ولا المدرب الأجنبي عمولته أحلى؟

إحنا قرفنا وزهقنا من الإستهتار والضعف والعشوائية وعايزين حل...أو جماهير الأهلي حاتمنعكم من دخول النادي قريبا جدا