لماذا غنى عمرو دياب ليوم التلات " أوحش يوم في الاسبوع " !!!

بعد ان غنى لبرج الحوت وتسبب في اشعال فتنة بين الابراج الاخرى ، هاهو عمرو دياب يغني ليوم التلات ليفجر ثورة غضب بين بقية ايام الاسبوع !
لماذا اختار عمرو دياب يوم التلات ليكرمه ويعطيه كل هذا الاهتمام مع انه  "أوحش يوم في الاسبوع " ؟!
ليه ؟!!
اولا يوم التلات لاهو ويك اند الناس بترتاح وتتفسح فيه ، ولا هو أول اسبوع الشغل والنشاط ، ولا هو يم الخميس بتاع السهر والانس ؟
ليه يوم التلات ؟!
يوم غلس بالنسبة لكل العاملين في البنوك والمصالح الحكومية .. زحمة وشغل كتير .
ويوم ممل وطويل ومفيش فيه ماتشات كورة ولا فرق الدوري الانجليزي بتلعب فيه .. لاصلاح ولا ليفربول ولا حتى الزمالك ( ومرتضى مابيشتمش فيه حد ) .
ويوم التلات مابتنزلش فيه افلام جديدة وأقل يوم في الاسبوع اقبالا على السينما وبتوع المسرح بيعتبروه يوم سخيف لان صالات المسرح بتكون فاضية من الجمهور .
ويوم التلات أزحم يوم في الشوارع وبالتحديد في الاحياء الشعبية لأنه يوم السوق " سوق التلات الشهير اللي كل بياعين الاقاليم بيزحفوا على القاهرة لبيع خضارهم وفاكهتهم وفراخهم ) !.
ويوم التلات مش يوم رومانسي خالص لان معظم الحبيبة بيناموا فيه بدري عشان عندهم شغل أو مدارس وجامعات الصبح ومابيعملوش مكالمات غرامية طويلة بالليل !.
يبقى ليه غنى عمرو دياب ليوم التلات بالذات ؟
أكيد عشان ده اليوم الوحيد اللي عمرو بيكون فاضي فيه ومابيكونش عنده فيه عشر حلات وخمس أفراح وتسع تسجيلات ومواعيد چيم  ونفخ عضلات !.
وأكيد برضه دا اليوم الوحيد اللي النجمة دينا الشربيني بتكون فاضيه له ومعندهاش تصوير عشروميت فيلم و مسلسل!!!!.

التعليقات