بقلم: أنور الوراقي

1- أول حاجة تعملها لازم تفك حزام الأمان، هتقول لى دة عكس المُعتاد، والمفروض الحزام يفضل مشدود، هقول لَك آه، لكن طبيعى أول ما تشوف اسم المدام على شاشة التليفون، لازم تفك الحزام فوراً، لأن مش هاتبقى خنقة التليفون، وخنقة الحزام سوا، إنت كدة هتموت يا ابنى قبل ما تفتح الخط!

2- اقفل الأغانى فوراً اللى إنت مشغَّلها، وشغَّل بدالها قرآن، ولو عندك بخور فى العربية ولَّع لك علبتين تلاتة بسرعة، لازم تخلى العفاريت تنصرف فوراً من العربية، كفاية اللى هيطلعوا على دماغك من التليفون أول ما تفتح الخط، الدُنيا مش ناقصة عفرتة!

3- اركن على جنب بقى، إوعى تتكلم وإنت سايق حتى لو كنت ماشى على الأول، صدَّقنى كدة هتلبس فى أى حاجة لأنك مش هتقدر تتحكِّم فى أعصابك ولا الدركسيون، إنت مش ضامن مستوى الكارثة اللى هتنُط فى ودنَك أول ما تقول آلو!

4- انزل بقى من العربية قبل ما ترُد، لاحظ إنك لو فضلت قاعد فيها، فمش هتستحمل الضغط، وأكيد هتنفجر من الغضب (مفيش مُكالمة من الست مش بتفجَّر من الغضب خصوصاً إنك سيبت الجرس يرن شوية على ما ولَّعت البخور وركنت العربية) ولو انفجرت من الغضب مُمكن تدغدغ العربية باللى فيها، ودى عليها اقساط، انزل أحسن لك وابعد عنها شوية، حاكم الصاج برضو غالى!

5- ابتعد كذلك عن الناس، وعن المنشآت، وعن سيارات الآخرين، فلن يتحمَّل غضبك أحد، واحتمال يترد لك الصاع صاعين، سواء بالضرب أو بالمُسائلة القانونية، ماهو مش معقول تفلت من تحطيم عربيتك، ومن الحادثة، وتلاقى نفسك لابس فى جناية ضرب أفضى إلى موت تدخل بيها السجن من 3 إلى 7 سنين، واحتمال تاخُد تأبيدة!

6- حاول تتكلِّم بمُنتهى الهدوء، هى آه هتشُك فى أدبك وقتها، وهتفتكر إنك بتحاول تدارى على مصيبة، وهتثور فى ودنك، وتقلب يومك جحيم، بس حاول، أما لو اتكلمت بانفعال يا عزيزى، فأكيد هى هتقول إن دة نتاج مصيبة إنت بتعملها حالياً، وإنك بجح (عامل مصيبة وكمان بتعلى صوتك)، وهتثور فى ودنك، وتقلب يومك جحيم، المُهم متحاولش تعمل ناصح ومتردش على التليفون، وإلا دة هايبقى معناه إنك بتعمل مصيبة، ومشغول بيها ـ بالمصيبة ـ عن الست مراتك!

7- بعد ما تخلَّص كُل دة، إوعى ترجع عربيتك، أكيد حالتك النفسية والعصبية متسمحش ليك بالسواقة دلوقتى وإلا برضو هتعمل حادثة وتروح فى داهية، خُد لك تاكسى أفضل، ومن بُكرة ابدأ عملية البحث عن حد يشترى عربيتك فوراً، وياخُد الموبايل هدية معاها!