بقلم: أنور الوراقي

1- اقنعها إنك صادق دائماً، ومُخلص ليها، وقُم بتأليف القصص التى تؤكد هذا، اتكلم مثلاً عن زميلتك فى الشغل التى راودتك عن نفسها، وطبعاً رغم إن كُل زمايلك هايموتوا عليها لأنها أجمل واحدة فى البلد كلها ـ فى نظرهم هما طبعاً أما إنت فمش بتشوف غير مراتك حبيبتك ـ إلا إنك رفضت بإصرار، وقولتلها أنا بحب مراتى، ومستحيل أخونها، ولطشتها قلمين كمان.. طبعاً زميلتك لا بصت لك ولا عبرتك، لكن مراتك هتحب الحاجات دى أوى، وهتصدقك فى حاجات كتير بعدها!

2- من ضمن الحاجات اللى مراتك هتصدقك فيها، هى إنك طبعاً لما ضربت زميلتك بالقلم علشان تحافظ على طهرك وشرفك، هى كادت ليك عند المدير، وراحت ضبطت الأمور معاه، فتم خصم نُص مرتبك، وبالتالى لازم تعيشوا بالنص التانى وتضحوا، أصل الشرف غالى، وقتها تقدر تلعب بديلك براحتك، سواء مع الستات، أو بالفلوس اللى اتوفَّرت ليك من المسلسل دة!

3- علشان ترفع من روحها المعنوية دايماً، خصوصاً وقت المشاكل، اصرف نظرها لحاجة كويسة، قول لها "إنتى كُل يوم بتصغرى عن التانى"، أو قول لها "هى اللى معاكى دى بنتك واللا أختك؟ مستحيل تبقى بنتك"!

4- كُل ما تلاقى (هيفاء وهبى) أو (سمية الخشاب) أو (مونيكا بيلوتشى) على الشاشة اشتمهم، العن سلسفيلهم بقرف، وقول "كُل دة سيليكون ومكياج وضحك على الدقون، لبس البوصة تبقى عروسة، إنما إنتى يا حبيبتى جمال أصلى، حاجة كدة هاند ميد، مش شغل مكن" طبعاً هى هتطير من الفرحة لما تؤكد لها كل لحظة إنها أجمل من (سمية) اللى هى فى الحقيقة بشعة من غير الماكياج واللبس والكلام الفاضى دة، وأكتر إثارة من (هيفاء) البلاستيك الكاوتش.. وطبعاً هى مش هتحفظ اسم (مونيكا بيلوتشى)، فمفيش داعى لتكراره إلا فى الصيدلية بقى!

5- خليها دايماً تعرف قيمة الراجل اللى معاها، كلمها عن صاحبك (عباس) اللى مسكوه فى شقة مفروشة كان بيخون مراته فيها، لمُجرَّد إنها اتخانقت معاه وخلته ينام زعلان، واحكى عن جدك لما كان بيصبَّح جدتك بعلقة ويمسيها بعلقة، ويجبرها إنها تغسل له رجليه بعد ما تقلعه الجزمة زى (أمينة) وسى (السيد)، وبعدين قول "طبعاً يا حبيبتى أنا مستحيل أعمل معاكى كدة ولا كدة؛ لأنى بحبك وبحترمك، إنتى شريكة حياتى مش خدامة".. هنا إنت بقيت فى نظرها فارس الأحلام اللى محصلش برضو!

6- لما تقعد على الفيس بوك، لاحظ إنها مراقباك، افضل نزِّل فى أدعية، وآيات قرآنية، وأحاديث وفتاوى للشيوخ، ومفيش مانع أبداً كُل فترة تكتب مع أى حاجة منهم دعاء "ربنا يخليكى ليا يا مراتى يا حبيبتى يا مهنيانى، يا شريكة حياتى، يا أفضل زوجة فى الدنيا".. بالمُناسبة متنساش "جمعة مباركة"، وياريت فى كُل وقت أدان تكتب على صفحتك "صلاة الظهر يا مسلمين" مثلاً، واصحى الفجر اكتب برضو "قيام الليل وصلاة الفجر يا مؤمنين".. اكتبها ونام تانى مش مشكلة، هى هتشوفها الصبح وهى بتدعبس وراك علشان تعرف كنت بتعمل إيه فى التليفون بالليل!