1- الصفحات: الولد هتلاقيه راشق في أي صفحة كرة قدم ولعيبة ومايوهات بيكيني على كام صفحة للـ Fitness Models، أما البنت هتلاقيها على صفحات الموضة والميك آب حتى لو الميك آب آرتيست بتعمل ميكياج في منور بيتهم هتلاقي معظم البنات عاملين لها لايك، ده غير صفحات المشاكل الزوجية حتى لو البنت مازالت سينجل، على شوية صفحات طبخ على مطاعم على open days على اكسسوارات مستعملة ولو فيه صفحة للـ (ولا حاجة) هتلاقيهم راشقين فيها برضه.
2- التعليقات: لما ولد يعلق عند صديق له، التعليق بيكون فيري اجريسيف من عينة "بس ياض لا اشردلك وسط مززك، عبيلو واديلو" وباقي التعليقات عبارة عن كلمات اعتراضية أو الكثير من حرف الـ "خاء"، بالنسبة للبنت لازم تلاقي على الأقل ٢٣٤ إيموشن وبعدين تبدأ بالتعبير من خلال بعض الكلمات مثل: باموت فيكي يا حياتي، مليش غيرك أصلاً، ازاي شكلك كيوت كده ؟ وحشتيني يا قلبي وميرسي يا قمراية يا حتة سكرة.
3- المنشورات: الولد عادة لما بيفكر يكتب بوست بينحصر ما بين تعليق على مباراة أو موقف كوميدي حصل له أو بيزيط من الزيطة في أي حدث محتاج هري كتير، بالنسبة للبنت بوستاتها بتنحصر في إنها يا إما مكتئبة أو عايزة تنتحر أو مكتئبة تاني أو عايزة تنتحر تاني أو محتاجة حضن يدفيها في الجو ده أو عاملة فيلينج هايبر وتلاقيها كاتبة جنب الفيلينج انها مكتئبة بردو .. طيب هايبر ومكتئبة؟ الاتنين؟ طب ازاي؟ فيه نوع تاني من البنات كل يوم بالليل خصوصاً في الشتا تلاقيهم كاتبين هوت تشوكليت تايم وهي في الحقيقة بتكون بتشرب شوربة عدس أصفر بالدقة والبصل الأخضر ومكسوفة تقول، دول ملناش دعوة بيهم ندعيلهم من بعيد لبعيد
4- الصور: في الحقيقة مفيش اختلاف قوي بين صور الولاد والبنات خصوصاً ان الجنسين متفقين على السيلفي الموحد بجميع أنوع البوزات باستثناء كام بوز مميز للبنات ولولا الملامة كان الولاد عملوا زيهم، الاتنين بيتصوروا سيلفي في الجيم وفي الحمام وفي المطبخ وفي الشغل وفي الشارع وفي العربية وتحت العربية وفي آخر رف في الدولاب إن أمكن، بس يوجد بعض البنات مازالوا يحتفظون بصور الفراشات والمناظر الطبيعية الخلابة والمشاهير كبروفايل بيكتشر علشان محدش ياخد صورهم دوناً عن كل الصور ويركبوها بالفوتوشوب على حاجات أستغفر الله العظيم، والشباب تعمل بيها حاجات استغفر الله العظيم. مسيرهم يستهدوا بالله ويقوموا يحطوا صورهم مفيش مشكلة، بالنسبة للولد ممكن ينزل الجيم يفحت نفسه ليل نهار لحد ما تبان له عضلة توحد ربنا يقوم رازع لنا صورة بالـ (كات) في عز الشتا علشان يبين للبنات انه جيمس بوند بالفطرة، ده بيجيب مع البنات قوي.. استمر يابنى.
5- اختبارات الذكاء: ( اسمك بيدل على شخصيتك، اعرف هتتجوز امتى، نفسيتك محتاجة إيه، تشبه مين من الممثلين.. الخ) بينقسموا إلى قسمين سواء للولاد أو البنات: القسم الأول بيعمل الاختبارات دي كل ما يظهر سؤال جديد قدامه ويعمله شير، والقسم التاني بينتقد القسم الأول بس بيلعبوها في السر من غير ما يعملولها شير علشان ما يبانش انهم تافهين زي غيرهم ودول مش محتاجين دعا ولا نصايح، دول سيبهم لحد ما يموتوا محروقين في مكانهم.